சென்னை:
ஐ.பி.எல்., தொடரின் முதல் போட்டியில் இன்று "நடப்பு சாம்பியன்' சென்னை சூப்பர் கிங்ஸ், மும்பை இந்தியன்ஸ் அணிகள் மோதுகின்றன. இரு வலுவான அணிகள் களமிறங்குவதால், விறுவிறுப்பான போட்டியை எதிர்பார்க்கலாம்.
ஐ.பி.எல்., தொடரில் ஐந்தாவது சீசன் இன்று துவங்குகிறது. இன்றைய முதல் லீக் போட்டியில் தோனியின் சென்னை சூப்பர் கிங்ஸ், ஹர்பஜனின் மும்பை இந்தியன்ஸ் அணிகள் களம் காணுகின்றன.
சொந்த மண் பலம், தொடர்ந்து இரு முறை கோப்பை வென்றது, வெற்றிகரமான கேப்டன் என்று புகழப்படும் தோனி ஆகிய சாதக அம்சங்கள் நிறைய இருப்பதால், சென்னை சூப்பர் கிங்ஸ் அணிக்கு "ஹாட்ரிக்' கோப்பை வெல்லும் வாய்ப்பு அதிகம் இருப்பதாக தெரிகிறது.
"சூப்பர் பார்ம்':
இதுவரை நடந்த நான்கு தொடர்களில் இரு முறை சாம்பியன், தலா ஒரு பைனல், அரையிறுதிக்கு முன்னேறிய பெருமை இந்த அணிக்கு உண்டு. துவக்கத்தில் அணியின் வெற்றி தோல்விகள் மாறி, மாறி சென்றாலும், கடைசியில் "டாப்-4' இடத்துக்குள் அணியை எப்படியாவது கொண்டு வந்து விடுவார் தோனி. அந்தளவுக்கு இவரது வியூகங்கள் வெற்றி தேடித்தரும் என்ற நம்பிக்கை உள்ளது. ஆனால், சமீபத்திய இந்திய அணிக்கு கிடைத்து வரும் தொடர் தோல்விகள், ஐ.பி.எல்., தொடரில் சென்னை அணிக்கு பாதிப்பு தருமா என்பது போகப் போகத்தான் தெரியும்.
புதிய துவக்கம்:
அணியின் துவக்க ஜோடி ஒவ்வொரு ஆண்டும் போல, இம்முறையும் மாறுகிறது. மைக்கேல் ஹசி வெஸ்ட் இண்டீசில் உள்ளதால், முரளி விஜயுடன், தென் ஆப்ரிக்காவின் டு பிளசிஸ் களமிறங்குவது ஏறக்குறைய உறுதியாகிறது. அதேநேரம், அனிருதா ஸ்ரீகாந்த், சுழல் வீரர் அஷ்வினுக்கும் அணிக்கு துவக்கம் தரும் வாய்ப்பு கிடைக்கும்.
"மிடில் ஆர்டரில்' பத்ரிநாத், ரெய்னா ஆகியோர் வலு சேர்க்கின்றனர். பின் வரிசையில் கேப்டன் தோனியுடன், சமீபத்தில் ரூ. 9.72 கோடிக்கு வாங்கப்பட்ட "ஆல் ரவுண்டர்' ரவிந்திர ஜடேஜா வருவதால் பேட்டிங் கூடுதல் பலம் பெறும்.
போலிஞ்சர் "ரிட்டர்ன்':
காயம் காரணமாக போட்டிகளில் பங்கேற்காமல் இருந்து வந்த ஆஸ்திரேலியாவின் போலிஞ்சர், புதுப்பொலிவுடன் இன்று களம் காணுகிறார். இவருடன் ஆல்பி மார்கல் வேகப்பந்துவீச்சை கவனித்துக் கொள்வார். சுழலில் வழக்கம் போல தமிழகத்தின் அஷ்வின் இடம்பெறுவார். நான்காவது வெளிநாட்டு வீரர் வாய்ப்பு, ஜார்ஜ் பெய்லி அல்லது குலசேகராவுக்கு கிடைக்கலாம்.
சச்சின் விலகல்:
மும்பை அணியை பொறுத்தவரையில் சச்சினிடம் இருந்து கேப்டன் பொறுப்பை ஏற்ற ஹர்பஜன், தன்னை மீண்டும் நிரூபித்தாக வேண்டிய கட்டாயத்தில் இவர் உள்ளார். இந்த அணியினர், சாம்பியன்ஸ் லீக்கில் அசத்தியது போல, ஐ.பி.எல்., தொடரிலும் கோப்பை வெல்ல வேண்டும் என களமிறங்கியுள்ளனர். இதற்கேற்ப அணியும் சரியான கலவையில் உள்ளது. துவக்கத்தில் சச்சினுடன், "ஜெட்' வேகத்தில் ரன்சேர்க்க ரிச்சர்டு லெவி உள்ளார். இவரை வெளியேற்றும் வேகத்தைப் பொறுத்து தான் சென்னை அணிக்கு வெற்றி வாய்ப்பு. "மிடில் ஆர்டரில்' ரோகித் சர்மா, அபு நேச்சிம், அம்பாதி ராயுடு, தினேஷ் கார்த்திக் உள்ளனர்.
சமீபத்தில் நல்ல "பார்மில்' <உள்ள போலார்டு மிரட்ட காத்திருக்கிறார். இதனால், ஹர்பஜன் கடைசி நேரத்தில் போட்டியை முடித்து தரும் வகையில் வரலாம். கிப்சும் அணியில் உள்ளார்.
பவுலிங் அபாரம்:
மும்பை அணியின் மற்ற அணிகளை விட சிறப்பாக உள்ளது. வேகத்துக்கு மலிங்கா, மிட்சல் ஜான்சன், முனாப் படேல், ஆர்.பி.சிங், திசரா பெரேரா உள்ளனர். சுழலில் ஹர்பஜன் சிங்கிற்கு கைகொடுக்க பிரக்யான் ஓஜா, ராபின் பீட்டர்சன் கூட்டணி காத்திருக்கிறது.2011 தொடரின் பைனலில், சென்னையிடம் தோல்வியடைந்து இருந்த மும்பை அணி, இன்று பழி தீர்க்க முயற்சிக்கும். அதேநேரம், சாம்பியன்ஸ் லீக் தொடர் லீக் போட்டியில் மும்பையிடம் அடைந்த தோல்விக்கு, சென்னையும் கணக்கு தீர்க்க காத்திருக்கிறது என்பதால், பரபரப்புக்கு பஞ்சமிருக்காது.